जिल्ला कृषि विकास कार्यालय पर्वतको चालु वर्षको बजेट तथा कार्यक्रम सार्वजनिक

असोज ११ पर्वत

जिल्ला कृषि विकास कार्यालय पर्वतले चालु आर्थिक वर्ष ०७३÷०७४ मा स्वीकृत भइ आएको बजेट तथा कार्यक्रम सरोकारवालाहरुका बीचमा सार्वजनिक गरेको छ ।
सोमवार कार्यालयमा आयोजित कार्यक्रममा चालु आर्थिक वर्षका लागि स्वीकृत भएका आएका कार्यक्रम र बजेटका बारेमा जानकारी दिएको हो । यस वर्ष ३ करोड ८६ लाख  १४ हजार रुपैया बराबरको बजेट तथा कार्यक्रम प्राप्त भएको हो । जसमध्ये चालु बजेटतर्फ ३ करोड ५१ लख ३८ हजार र पुँजीगत बजेट तर्फ ३४ लाख ७६ हजार रुपैया रहेको छ ।
जिल्लाको एक नगरपालिका र ४७ वटा गाउँ विकास समितिमा खाद्यान्न, तरकारी, साना सिंचाई तथा फलफुलको पकेट तथा उत्पादन बृद्धिका लागि उक्त रकम खर्चिने भएको छ । सुन्तला जात फलफुल, व्यावसायीक तरकारी, व्यावसायीक मकै, कृषि प्रविधि विस्तार, खाद्यान्न दलहन तथा तेलवाली उत्पादन, मौरी तथा च्याउँ विकास कार्यक्रम लगायतका कार्यक्रमहरु संचालन हुने भएका छन् ।

उक्त बजेट बाहेक केन्द्रिय कार्यक्रम अन्तर्गत ४ करोड ३६ लाख ९७ हजार बजेट पनि प्राप्त भएको छ । जिल्लाको समग्र कृषि क्षेत्रको विकासका लागि भन्दै केन्द्रिय स्तरका योजनाहरुमा खर्चिनका लागि उक्त बजेट प्राप्त भएको बरिष्ठ कृषि विकास अधिकृत बासुदेव रेग्मीले जानकारी दिनुभयो ।
त्यस्तै पहिलोपटक प्रधानमन्त्री कृषि आधुनिकिकरण परियोजना पनि पर्वतमा आएको छ । २ करोड ७५ लाख रुपैया बराबरको परियोजना जिल्लाका दुवै निर्वाचन क्षेत्रमा विस्तार गरिने भएको छ । प्राप्त बजेट र स्वीकृत कार्यक्रमकमा बारेमा बरिष्ठ कृषि  विकास अधिकृत बासुदेव रेग्मीले प्रकाश पार्नुभएको थियो ।  कार्यक्रममा सहभागिहरुले पर्वत कृषि उत्पादनको हिसावल आत्मनिर्भर उन्मुख बन्दै गएकाले कृषकलाई प्रत्यक्ष लाभ पुग्नेगरी काम गर्न सुझाव दिएका छन् । सवै बालिनालीको पकेट क्षेत्रलाई महत्व दिनुपर्नेमा पनि सहभागिहरुले जोड दिएका हुन् ।

कार्यक्रममा जिल्लास्थित राजनीतिक दलका प्रमुख तथा प्रतिनिधि, व्यावसायीक कृषक, विभिन्न कार्यालयका प्रमुखहरु, गैरसकारी संघ संस्थाका प्रमुख तथा प्रतिनिधि र पत्रकारहरुको सहभागिता रहेको थियो ।
कार्यक्रममा प्रमुख जिल्ला अधिकारी शम्भुप्रसाद मरासिनी, स्थानिय विकास अधिकारी युवराज पौडेल लगायतले पनि बोल्नुभएको थियो । कार्यक्रमको संचालन बागवानी विकास अधिकृत अजय अधिकारीले गर्नुभएको थियो ।