बजार अनुगमन आक्रामक बनाउदै प्रशासन
म्याग्दी ६ असोज । बेनीमा स्थानीय प्रशासनले बजार अनुगमनलाई आक्रामक रुपमा अघि बढाएको छ ।
    यसअघि ब्यवसायीलाई सचेत बनाउने हिसावले अनुगमन गर्दै आएको प्रशासनले बुधबारदेखि म्याद नाघेका बस्तुहरु जफत गर्न थालेको हो ।

पहिले सचेत बनाइएका ब्यवसायीले अटेर गरेर म्याद नाघेका खाद्यबस्तु बिक्रीका लागि राखेको पाइएपछि बरामद गरिएको अनुगमन टोलीका संयोजक सहायक प्रजिअ शोभाखर पोख्रेलले जानकारी दिनुभयो ।

    दुई वटा खाद्यान्न पसलबाट म्याद नाघेका खाद्यान्न, पेय पदार्थ र केही औषधि पसलहरुबाट म्याद नाघेका औषधि बरामद गरेको हो । यसअघि दिइएको निर्देशन पालना भए नभएको विषयमा बुधबार दोहोराएर अनुगमन गरिएको थियो ।

धेरैले निर्देशन अनुसार मूल्य सूची र बोर्ड राखेपनि अटेर गर्ने ब्यवसायीहरुलाई कानुनी कारबाही गर्ने चेतावनी दिएको टोलीले जनाएको छ । सहायक प्रजिअ पोख्रेल नेतृत्वको टोलीले बेनीका औषधी पसलहरुको पनि अनुगमन गरेको थियो ।

औषधि पसलहरुले प्रक्रिया पुरा नगरी डाक्टरको नाम प्रचार गरेर बिरामी जाँच्ने गरेको सर्वसाधारणले गुनासो गरेका छन् । चिकित्सकले सिफारीस गरेका औषधि बिक्री मात्र गर्ने अनुमती भएका औषधि पसल सञ्चालकले आफै बिरामी जाँचेर औषधि दिने गरेको गुनासो आएको छ ।

    पहिलो पटक सचेत बनाएको टोलीले पुन अनुगमनका क्रममा गल्ती दोहोराएको भेटिएमा कारबाही प्रक्रिया अघि बढाउने चेतावनी दिएको छ । यसअघिका अनुगमनका क्रममा पनि पटक पटक निर्देशन र चेतावनी दिएको प्रशासनले कमजोरी गर्ने ब्यवसायीलाई कारबाही गर्न भने सकेको छैन् ।

    अनुगमनमा प्रहरी, कोष तथा लेखा नियन्त्रक कार्यालय र जनस्वास्थ्य कार्यालयका प्रतिनिधिको साथमा उपभोक्ता अधिकारकर्मीको समेत सहभागिता रहेको थियो । चाडपर्व नजिकिदै गर्दा स्थानीय प्रशासनले अनुगमनलाई तिब्रता दिएको छ ।