कृषकको प्रबिधि र सेवामा पहुँच बढाउन प्राथमिकता
    कार्तिक १४ म्याग्दी
कृषि विकास मन्त्री गौरीशंकर चौधरीले सरकारले कृषकको प्रबिधि र सेवामा पहुँच बढाउन जोड दिएको बताउनुभएको छ ।     प्रेस सेन्टर नेपाल जिल्ला शाखा म्याग्दीले शनिबार बेनीमा आयोजना गरेको पत्रकार सम्मेलनमा मन्त्री चौधरीले कृषि उत्पादनलाई वृद्धी गर्न कृषकको प्रबिधि र प्राबिधिक सेवामा पहुँच बढाउने कार्यक्रमलाई प्राथमिकता दिएको बताउनुभयो ।     यस वर्षदेखि प्रधानमन्त्री कृषि परियोजना अन्तरगत स्थान बिशेष जोन, सुपर जोन र बल्क आयोजना सञ्चालन गर्न लागिएको जानकारी दिदै मन्त्री चौधरीले कृषकलाई निवृतीभरण सेवा दिने विषयमा सर्वेक्षणको काम अघि बढाइएको बताउनुभयो ।

    कृषक समूह, सहकारी र ब्यवसायीक फार्मलाई लक्षित गरेर मन्त्रालय र विभिन्न परियोजनाहरुले कार्यक्रम सञ्चालन गरेको उहाँले बताउनुभयो । यसैगरी मन्त्री चौधरीले सहुलियतको कृषि कर्जा सहज र सरल रुपमा पाउने ब्यवस्था मिलाउन अर्थ मन्त्रालय र राष्ट्र बैङ्कसंग छलफल अघि बढाएको बताउनुभयो ।

बाली बिमा कार्यक्रमलाई प्रभावकारी बनाउन कृषकलाई सचेत र प्रचारप्रसारमा जोड दिइएको मन्त्री चौधरीले जानकारी दिनुभयो । अनुदान पाउनका लागि मात्र कृषि ब्यवसाय गर्ने र अनुदान सकिएपछि बन्द गर्ने प्रवृती समस्याको रुपमा देखिएको बताउदै उहाँले त्यसलाई नियन्त्रण गर्न अनुगमन भैरहेको र कृषक जिम्मेवार बन्नुपर्नेमा जोड दिनुभयो ।
नेकपा माओवादी केन्द्रका नेता समेत रहनुभएका चौधरीले स्थानीय तहको निर्वाचनको वातावरण बनाउन सरकारले प्रमुख र असन्तुष्ट दलहरुसंग सहमती गरेर संबिधान संसोधनको तयारी गरेको जानकारी दिनुभयो । स्थानीय तहको टुङ्गो लागेपछि सरकारले निर्वाचनको मिती घोषणा गर्ने बताउनुभयो ।

अख्तियार दुरुपयोग अनुसन्धान आयोगका प्रमख आयुक्त लोकमानसिङ कार्कीले संबिधान, कानुन र मूल्य मान्यता विपरीत काम गरेकाले उनको विरुद्धमा संसदमा महाअभियोग प्रस्ताव दर्ता गरेको बताउनुभयो । महाअभियोग प्रस्तावले मुख्य दलहरु नजिकीएकाले राजनितिक वातावरण सहज बन्ने विश्वास व्यक्त गर्नुभयो ।

भारत र चिनका राष्ट्रप्रमुखको आसन्न भ्रमण नेपालको आर्थिक र विकास निर्माणका साथै सम्बन्ध सुधारमा उपलब्धीमुलक बन्ने मन्त्री चौधरीको भनाई थियो । छिमेकी देशका राष्ट्रपतीको भ्रमणका क्रममा सार्वजनिक विदा दिने निर्णय राष्ट्रपति विद्यादेवी भण्डारीको अनुरोध र सबै राजनितिक दलको सहमतीमा भएको उहाँले बताउनुभयो ।

प्रेस सेन्टर म्याग्दीका अध्यक्ष कमल खत्रीको अध्यक्षता र सचिव सन्दिप खत्रीको सञ्चालनमा कार्यक्रम सम्पन्न भएको थियो ।