ब्लडक्यान्सर पिडित महिलाद्धारा सहयोगको अपिल
बागलुङ १३ कार्तिक
ब्लडक्यान्सर रोगवाट पिडित यहाँकी एक महिलाले उपचारका लागि आर्थिक सहयोग गरिदिन अपिल गरेकि छिन् ।
आर्थिक अवस्था अत्यन्तै नाजुक भएकी बागलुङ नगरपालिका–७ की ४२ वर्षिया महिला धनमाया विश्वकर्माले उपचारका लागि आर्थिक सहयोग गरिदिन अपिल गरेकि हुन् । चार छोरी र एक नावालक छोराकी आमा समेत रहेकी विक अहिले राजधानीमा त्रिविवि शिक्षण अस्पतालमा उपचाररत रहेकी छिन् । दिनभरी श्रम गरेर रातीको छाक टार्ने समस्या भएको परिवारमा एक्कासी ब्लड क्यान्सरजस्तो रोग बल्झिएपछि परिवार विचल्ल्लीमा परेका छन् ।
आमाको उपचार राजधानीमा भैरहँदा घरमा चार छोरी सहित नावालक छोराको झनै बिचल्ली परेको छ । उपचार गर्नका लागि पर्याप्त रकम नहुँदा अहिले जीवन मरणको दोसाँधमा छटपटिइरहेको उनकी छोरी पुनम विकले बताईन । उनका छोरीहरु मध्ये एउटीको विवाह भैसकेको छ भने अर्का तीन जना भने कक्षा १०, ८, ७ मा अध्ययनरत रहेका छन् ।
रोजगारीका लागि पिडित महिलाका श्रीमान हिमबहादुर विक साउदी अरबमा भएपनि गतिलो कमाई नभएका कारण घर फर्किन सकेका छैनन् । उनको उपचारका लागि  झण्डै १५ लाख उपचार खर्च आवश्यक पर्ने भएपनि अहिले १५ रुपैया पनि नहुँदा झनै समस्या थपिएको पिडित महिलाले रुदै गुनासो गरिन् । उनले भनिन् ‘उपचार गरेर निको भएमा पुनः मजदुरी गरेर परिवारको लालन पालन गर्ने थिए यदि म मरे भने मेरो नावालक छोरा सहित छोरीहरुको बिचल्ली हुन्छ ।’
खेतवारीको नाममा सानो झुपडी मात्रै छ अन्य आम्दानीको कुनै बाटो छैन उनले आँसु पुछ्दै भनिन् कुनै निकाय वा व्यक्तिले आर्थिक सहयोग गरिदिएमा निकै ठुलो कल्याण हुने थियो । गरिबीको कारण आफु उपचार गर्न नसकि मृत्युशैयामा छटपटाउनुपरेको बताईन ।
शुरुमा ढाड दुःख्ने समस्या भएपछि बागलुङमा रहेको धौलागिरि अञ्चल अस्पताल, पोखराका विभिन्न अस्पतालमा पुगिन तर निको नभएपछि राजधानीमो त्रिवि शिक्षण अस्पतालमा पुगेर परिक्षण गराउँदा ब्लड क्यान्सर भएको पत्ता लागेको थियो । उनि विगत एक महिनादेखि उक्त अस्पतालमा उपचार गरिरहेकी छिन् । पर्याप्त रकम जुटाएपछि मात्र उपचार हुने भएकोले चिकित्सकहरुले रकमको जोहो तत्काल गर्न भनेपनि अहिलेसम्म एक रुपैया कतैवाट सहयोग नभएपछि उपचार हुने अवस्था नरहेको उनका आफन्तहरुले गुनासो गरेका छन् । उनलाई एक साताभित्रै उक्त रकम जम्मा गर्न पनि अस्पतालले ताकेता गरेको छ ।
पिडित परिवारले सहयोगका लागि ९८२१३२८३५७ मा सम्पर्क राख्न पनि आग्रह गरेका छन् ।