महायज्ञको छैठांै दिन २२ लाख संकलन
बाग्लुङ, १० असोज
विद्यालय पुनर्निमाण गर्ने उद्देश्यले विद्यामन्दिर उच्च माध्यमिक विद्यालय बागलुङले संचालन गरेको महायज्ञको छैठौं दिन सोमबार २२ लाख १२ हजार १ सय २६ रुपैयाँ संकलन भएको छ ।
महायज्ञ मूल आयोजक समितिका कोषाध्यक्ष ईश्वरलाल ब्रजाचार्यका अनुसार, उल्लेखित रकममध्ये १५ लाख ४५ हजार ८ सय २० नगद संकलन भएको छ । यस्तै वाक्दान अन्तर्गत ६ लाख ६६ हजार ६ सय ६६ संकलन भएको छ । धान बिक्रीबाट ३ हजार ३ सय संकलन भएको छ । दानपात्रबाट ५६ हजार ३ सय ५० नगद संकलन भएको छ ।

ब्रजाचार्यका अनुसार, बा.न.पा.–२ का विद्या खड्का, राजेन्द्र खड्का, महेन्द्र खड्का, श्री खड्का र बुहारी समेतले आफ्ना बुबा पूर्व राज्यमन्त्री तेजेन्द्रबहादुर खड्का र आमा सूर्जमाया खड्काको स्मृतिमा ५ लाख ५ हजार ५ सय ५५ को अक्षयकोष स्थापना गरेका छन् ।
यस्तै विद्यालयलाई एक लाखभन्दा बढी रकम प्रदान गर्नेहरुमा बा.न.पा.–२ का पदमकुमारी खड्का, मुवाकुमारी श्रेष्ठ, सूर्यकुमारी श्रेष्ठ, जानकी केसी, बालकृष्ण शर्मा पौडेल, चन्द्रकुमार श्रेष्ठ, गोपालप्रसाद श्रेष्ठ र  बानपा ३ का शिवकुमार प्रधान रहेका छन् ।
महायज्ञमा पूर्वविद्यार्थीहरुको पुनर्मिलन कार्यक्रम पनि सम्पन्न भएको छ । पुर्नमिलन कार्यक्रमका संयोजक बाबुलाल शाक्यका अनुसार, ५१ सालदेखि ५८ सालसम्मका विद्यार्थीहरुको पुनर्मिलन कार्यक्रम गरिएको थियो । सोमबार पुर्नमिलनमा सम्मिलित ५६ सहित अहिलेसम्म तिन सय विद्यार्थीहरु पुर्नमिलनमा सहभागी भएका छन् ।

महायज्ञमा बिहानैदेखि श्रद्धालु भक्तजनहरुको भीड लागेको जानकारी विद्यालयले दिएको छ । महायज्ञमा कृष्णलीलाका झाँकीले भक्तजनहरुलाई भरपुर मनोरन्जन दिएको थियो । महायज्ञ कार्तिक १० गतेसम्म सञ्चालन हुनेछ ।