रेमिट्यान्सले फरियो म्याग्दीको दलित बस्ती
म्याग्दी ५ कार्तिक

घरमा आर्कषक टिभी, गोठमा दुहुनो भैसी र बैकमा पैसा । केहीबर्ष अगाडीसम्म म्याग्दीको पुलाचौर पुरुन्नेका दलित समुदायलाई यो सपना जस्तै लाग्थ्यो । आर्थिक अवस्था कमजोर भएकै कारण दैनिक ज्याला मजदुरी गरेर घरखर्च चलाउने गरेका बेनीनगरपालिका–११ पुरुन्नेका दलितहरूको दैनिकीमा परिवर्तन आएको छ । गाउँबाट धमाधमा बैदेशिक रोजगारमा जानेहरूको लर्को लाग्न थालेपछि पुरुन्नेबासीको हातमा मोवाईल घरमा महँगो टिभी र सहर बजारमा घरघडेरी समेत छन् ।

आर्थिक अवस्था अत्यन्त कमजोर भएपछि छिमेकीको घरमा भाडा, दैनिक मजदुरी गरेर गास जुटाउने गरेका महिलाहरू छोराहरुलाई ऋण खोजेर विदेश पठाएको केहीबर्षमै गाउँमा आफ्नै घर सहित आधुनिक सुविधा उपभोग गरिरहेका छन् ।
गाउँघरमा दैनिक समय काट्ने गरेका यूवाहरू विदेश गएर धमाधम रेमिट्यान्स मार्फत पैसा पठाउन थालेपछि  पुरुन्नेम ब्यक्तिगत जिवनस्तरका साथै समुदायमा समेत सरसफाई सहित परिवर्तन भएको पुरुन्नेका अगुवा टिकाराम परियारले बताउनुभयो ।

१०३ घरधुरी रहेको पुरुन्नेका अधिकांस घरबाट खाडी मुलुक कतार, साउदी अरव, बराईन, मलेसिया, भारत लगाएतका देशमा गएपछि गाउँको रुप फेरिएको छ । आर्थिकस्तरमा परिवर्तन भएसँगै सरसफाई सहित जनचेतनामुलक कार्र्यमा समेत गाउँले सक्रिmय छन् । पुरुन्नेमा मासिक १० लाखबढी रेमिट्यान्स वापतको रकम भित्रिने गरेको छ । आर्थिकस्तरमा परिवर्तन भएपछि सरसफाई, नयाँ प्रविधिको प्रयोग, शिक्षादिक्षामा समेत सहज भएको छ । बालबालिकाहरुले समेत निजी तथा गाउँकै सामुदायिक विद्यालयमा समेत उत्कृष्ट अंक ल्याउन सफल भएका छन् । श्रीमान विदेश गएपछि महिलाहरुले गाउँमा फेन्सी, सिलाईकटाई, खुद्रा पसल सहित विभिन्न स्वरोजगारमुलक काम गरिरहेका छन् ।