पर्वतमा माटो परिक्षण प्रयोगशाला स्थापना
    पर्वत १५ असोज
    
समयसमयमा खेतवारीको माटोको उपचार गर्न नसक्दा उत्पादनमा गिरावट आउने गरेको कृषकहरुको गुनासो आएपछि पर्वतमै माटो परिक्षणका लागि प्रयोगशाला स्थापना गरिएको छ । जिल्ला कृषि विकास कार्यालय पर्वतले पहिलोपटक जिल्लामै प्रयोगशाला स्थापना गरेको हो । चालु आर्थिक वर्षको कार्यक्रम अन्तर्गत प्रयोगशालाका लागि आवश्यक उपकरण र जनशक्ति तयार गरेर प्रयोगशाला संचालन गरिएको बरिष्ठ कृषि विकास अधिकृत बासुदेव रेग्मीले जानकारी दिनुभयो । उहाँका अुनसार कार्यालयकै कृषि प्राविधिकहरुलाई माटो परिक्षण सम्वन्धि तालिम दिएर दक्ष बनाइएको छ भने प्रयोगशालाका लागि आवश्यक झण्डै पाँच लाख रुपैया बराबरको मेशिन समेत खरिद गरिएको छ । त्यसैगरी माटो परिक्षण गर्न उपयोग हुने केमिकल समेत खरिद गरिएको छ ।

शुरुमा कार्यालयकै भवनबाट परिक्षण सेवा शुरु गर्ने र प्रयोगशालाका लागि छुट्टै भवन निर्माण गर्ने तयारी पनि भैरहेको बरिष्ठ कृषि विकास अधिकृत रेग्मीले जानकारी दिनुभयो । प्रयोगशाला नहुँदा यस अघि पोखरामा रहेको क्षेत्रीय माटो प्रयोगशालाबाट प्राविधिक र विज्ञहरु बोलाएर विभिन्न गाउँमा शिविर संचालन गर्नुपर्ने अवस्था रहेको थियो । अब भने जिल्लाका जुनसुकै क्षेत्रका कृषकले पनि सहज रुपमा कार्यालयमै आएर माटो परिक्षण गर्न पाउने भएका छन् ।

बाहिरवाट प्राविधिक बोलाएर शिविर संचालन गरेर माटो जाँच गर्दापनि त्यति प्रभावकारी बन्न सकेको थिएन अब जिल्लामै संचालन भएपनि कृषकहरु बढि मात्रामा लाभान्वित हुने भएका छन् रेग्मीले भन्नुभयो । प्रयोगशालाका लागि आवश्यक जनशक्ति समेत तयार भैसकेको छ । कम बजेटमा सवै कृषकहरुलाई सेवा दिने उद्धेश्यले जिल्लामै प्रयोगशाला स्थापना गरेका हौ कार्यालयका प्राविधिक रामकृष्ण अर्यालले भन्नुभयो सदरमुकामसम्म आउन असहज हुने गाविसका बासिन्दाहरुलाई स्थानियस्तरमै पुगेर पनि जाँच गर्न सक्नेछौ ।

बर्षको एक पटक नियमित रुपमा माटो परिक्षण गर्न सकेमा खेतवारीको उत्पादकत्वमा बृद्धि गर्न सकिने र माटोको उपचार पनि गर्न सकिने अर्यालले जानकारी दिनुभयो ।