माझफाँटमा एक घर एक धारा विस्तार योजना अन्तिम चरणमा
पर्वत, १७पुस

व्यवस्थित शहरबजार जस्तै यहाँको एक गाउँमा पनि घर घरमै धारा विस्तार गरिने भएको छ । उत्तरी पर्वतको माझफाँट गाविसका ८ सय घरधुरीमा एक घर एक धारा विस्तार गरिने भएको हो । गाविसमा संचालित पुङ्दीखोला खानेपानी तथा सरसफाई आयोजना मार्फत गाउँका ३ देखि ७ नम्वर सम्मका वडा गरी ५ वटा वडाका सवै घरधुरीमा खानेपानीका धारा निर्माण गरिएको छ । अहिलेसम्म उक्त आयोजनाको ८० प्रतिशत काम सम्पन्न भैसकेको खानेपानी तथा सरसफाई डिभीजन कार्यालय पर्वतले जनाएको छ ।

अहिलेसम्म कुवा वा धाराको अव्यस्थित र स्वच्छ पानी पिउनबाट बञ्चित बनेका मल्लाजबासिहरु अबभने लाभान्वित हुने भएका छन् । जिल्लाकै दोस्रो ठुलो योजनाको रुपमा रहेको उक्त खानेपानी आयोजना विस्तार भएपछि प्रत्येक घरमा आवश्यकताका आधारमा धारा जडान हुनेछ र उपभोक्ताहरुले यूनिटको आधारमा पैसा तीर्न पाउने भएका छन् । उक्त पानी झण्डै १२ किलोमिटर टाढा रहेको पुंङ्दीखोलाबाट ल्याउन लागिएको हो ।
अहिले आयोजनाको काम धमाधम भैरहेको छ । २०६७÷२०६८ बाट शुरु भएको योजना क्रमागत रुपमा रु ४ करोड ९३ लाखको लागतमा निर्माण हुन लागेको उक्त योजनामा स्थानियले झण्डै ३९ लाख बराबरको श्रमदान गरेका छन्

 पाईपलाई बिस्तार र विभिन्न ट्यांङ्कीहरु निर्माणमा स्थानिय श्रमदान समेत गरिरहेका छन् । भने ८० जना भन्दा बढि मजदुरहरु क्रियाशिल रहेको निर्माण व्यावसायी गिरिजा तिवारीले जानकारी दिए । चालु आर्थिक वर्ष भित्रमा सम्पन्न गर्नेगरी धमाधम काम भैरहेको तिवारीले जानकारी दिए । योजनाको लागत अनुसार बजेट कम भएको र भिरालो जमिनमा काम गर्नुपर्दा असहजता पैदा भएको उनको भनाई छ ।

एक घर एक धारा विस्तार गर्ने सरकारकै निति अनुरुप बृहद खानेपानी योजनामा समेटिएको उक्त योजनाको काम द्रुत गतिमा भएको खानेपानी तथा सरफाई डिभीजन कार्यालयका प्रमुख प्रेमप्रसाद डोटेलले जानकारी दिए । उनका अनुसार योजनालाई चालु आर्थिक वर्ष भित्रै सम्पन्न गर्नका लागि यस वर्ष ८० लाख रुपैया बिनीयोजन समेत भएको छ । जिल्लाकै ठुलो र नमुना योजना भएकाले व्यवस्थापनका लागि भवन निर्माण समेत गर्ने सोच रहेको छ ।  यो बाहेक पर्वतको फलेवासमा ७ करोड रुपैयाको लागतमा बृहद फलेवास खानेपानी योजना पनि विगत दुई वर्षदेखि निर्माणाधिन अवस्थामा रहेको छ । उक्त योजना निर्माण सम्पन्न भएपछि माझफाँट गाविसका सवैजसो घरधुरी लाभान्वित हुने अपेक्षा कार्यालयले लिएको कार्यालय प्रमुख डोटेलले बताए । जिल्लाको सवैभन्दा बढि जनसंख्या रहेको उक्त गाविसमा यो खानेपानी योजना निर्माण पश्चात नमुनाकै रुपमा लिन सकिने उनि बताउँछन् ।

    घर घरमा धारा जडान गर्नका लागि आवश्यक खर्च पनि स्वयं उपभोक्ता तिर्नुपर्ने भएको छ । अहिले उक्त योजना व्यवस्थापन समितिले एक धारा बराबर ७ हजार रुपैया तोकिसकेको छ । सदरमुकाम कुश्माबजारमा प्रतिधारा जडान शुल्क ३० हजार भन्दा बढि रहेका बेला ग्रामीण क्षेत्रमा विस्तार गर्न लागिएको योजनामा तत्कालका लागि ७ हजार रुपैया तोकिएको समितिका अध्यक्ष लालबहादुर अधिकारीले जानकारी दिए । उनका अनुसार सवै उपभोक्ताहरुको सहभागितामा धाराको मुल्य तोकिएको हो ।
    यसैबीच खानेपानी तथा सरसफाई डिभिजन कार्यालयको आयोजनामा उपभोक्ताहरुका लागि पुर्नताजगी तालिम सम्पन्न भएको छ । तालिममा योजनाको व्यवस्थापन निर्माण कार्यको अवस्था, खानेपानी धारा वितरण, धाराको महसुल लगायत योजनाको समग्र व्यवस्थापनका बारेमा सहजीकरण गरिएको थियो ।