संशोधन प्रस्ताव स्थगन गर – नेता पोखरेल
बागलुङ,११पुस
नेकपा (एमाले) का महासचिव ईश्वर पोखरेलले संसद्मा दर्ता भएको संशोधन प्रस्ताव स्थगन गर्नुपर्ने बताउनुभएको छ । प्रेस चौतारी नेपाल बागलुङ शाखाले आज आयोजना गरेको पत्रकार भेटघाटमा बोल्दै नेता पोखरलले संविधान संशोधन अहिलेको आवश्यकता नभएको उल्लेख गर्नुभयो ।‘सरकारले संशोधन प्रस्ताव फिर्ता लिन नसक्ने हो भने स्थगित गरोस्’ नेता पोखरेलले भन्नुभयो । उहाँले अहिलेको संशोधन प्रस्ताव राष्ट्रिय हितको प्रतिकूल रहेको बताउनुभयो । संविधान संशोधनको विपक्षमा एमाले नरहेको भन्दै नेता पोखरलले अभ्यास, अनुभव र औचित्यका आधारमा मात्र संविधान संशोधन हुनसक्ने विचार राख्नुभयो । संशोधन प्रस्तावमा ल्याइएका भाषा, नागरिकता, प्रतिनिधित्व र सीमा हेरफेर सम्बन्धी बुँदामा एमाले सहमत हुननसक्ने उहाँको जिकिर छ ।

“प्रदेशको सीमा हेरफेर हुनसक्छ, तर संवैधानिक व्यवस्था अनुसार हुनुपर्छ” नेता पोखरेलले भन्नुभयो ‘प्रदेश सभालाई मात्र त्यो अधिकार छ, संविधानको धारा २७४ मा त्यो स्पष्ट किटान गरिएको छ ।’ राष्ट्रिय हित, सामाजिक सद्भाव, एकता, जनभावना र संविधान विपरीत संशोधन प्रस्ताव आएकोले त्यसको विरोध गर्नुपरेको उहाँको भनाइ छ । संशोधन प्रस्तावमा छलफल समेत हुन नदिने भन्दै नेता पोखरेलले सरकारलाई निर्वाचनको तयारीमा लाग्न आग्रह गर्नुभयो । ‘संशोधन “प्रस्तावलाई स्थगन गरेर सरकारले मुलुकलाई निर्वाचनतिर लगोस्, एमाले पूर्णरूपमा सहयोग गर्न तयार छ” नेता पोखरेलले भन्नुभयो । निर्वाचनसँगै संविधान पनि कार्यान्वयनमा जाने उहाँको भनाइ छ ।