म्याग्दी यातायात सेवाका जिप तोडफोड
मंसिर १९ , म्याग्दी

पश्चिम म्याग्दी यातायात सेवा प्रालि दरबाङले बेनी–दरबाङ सडकखण्डमा सञ्चालन गर्न ल्याएको दुईवटा जिप पर्वत बेनीमा तोडफोड भएको छ । दरबाङमा भोलि उद्घाटन गरी सञ्चालनमा ल्याउने तयारीका साथ ल्याउन लागेको जिपमध्ये दुईवटा जिपको अगाडिको सिसा, झ्याललगायतमा क्षति पुगेको छ । म्याग्दी आउने क्रममा गएराति करिब १० बजे आठ÷नौजनाको समूहमा आएका युवाले तोडफोड गरेको प्रालिका अध्यक्ष श्रीप्रसाद रोकाले बताउनुभयो ।

उहाँले म्याग्दी जिप तथा बस सञ्चालक समितिअन्तर्गतको काउन्टरका कर्मचारीले आफ्नो प्रालिको सेवा सञ्चालन हुन नदिने नियतले उक्त तोडफोड गरेको दाबी गर्नुभयो । उक्त समूहले जिप चालकलाई पनि हातपातको प्रयास गरेको बताइएको छ । म्याग्दीका प्रहरी नायब उपरीक्षक विश्वराज खड्काले घटनालगत्तै तोडफोड भएका जिपलाई प्रहरी कार्यालयमा ल्याइएको र दोषीलाई पर्वत प्रहरीसँग समन्वय गरी खोजी गरिरहेको बताउनुभयो ।

 यसैबीच, उक्त तोडफोडमा आफ्नो समितिको कुनै संलग्नता नभएको म्याग्दी जिप तथा बस सञ्चालक समितिका कार्यालय प्रमुख देवेन्द्र पौडेलले जानकारी दिनुभएको छ । उहाँले उक्त प्रालिसँग सेवामा प्रतिस्पर्धा गर्न समिति तयार रहेका कारण समितिले कुनै पनि अनैतिक प्रतिस्पर्धा नगर्नेसमेत बताउनुभयो ।