टुकुचे र कोवाङलाई छुट्टै गाउँपालिका बनाउन आन्दोलन
मङ्सिर १८, मुस्ताङ
मुस्ताङको टुकुचे र कोवाङ गाविसलाई छुट्टै गाउँपालिका बनाउन माग गर्दै स्थानीयवासी आन्दोलित भएका छन् । स्थानीय तह पुनःसंरचना प्राविधिक सहयोग समितिले आफूहरूलाई कुनै जानकारी नदिई दुई गाविसलाई थासाङ गाउँपालिकामा समावेश गरेको भन्दै उनीहरू आन्दोलित बनेका हुन् । लामो समयदेखि दुई गाविसलाई एक गाउँपालिकामा समावेश गर्न माग गर्दै ज्ञापन बुझाइए पनि सहयोग समितिले आफूहरूको माग सुनुवाइ नगरेको स्थानीयवासीको गुनासो छ ।

 दुई गाविसका स्थानीयवासीले कोबाङ र सदरमुकाममा निरन्तर प्रदर्शन गर्दै आएका छन् । दुई गाविसका स्थानीयवासीले बिहीबार जिल्लामा तीनघन्टा यातायात बन्द गरेका थिए भने बन्द जोमसोम विमानस्थलमा टायर बालेर प्रदर्शन गरेका थिए । स्थानीय अगुवा हेमन्त गौचनले ऐतिहासिक निरन्तरता, भौगोलिक सुगमता र जनसङ्ख्याको हिसाबमा दुई गाविसलाई मिलाएर गाउँपालिका बनाइनुपर्ने बताउनुभयो ।

    “हामीलाई लेते केन्द्र धेरै टाढा हुन्छ । यो विषयमा हामीले निरन्तर खबरदारी गरिरहेका छौँ”, उहाँले भन्नुभयो । दुई गाविसमा थकाली समुदायको जनसङ्ख्या धेरै रहेको छ । स्थानीय विकास अधिकारी हरिप्रसाद बाँस्तोलाले स्थानीयवासीको मागका विषयमा आयोगमा जानकारी गराइएको बताउनुभयो । “सुरुमा उहाँहरूको मागका विषयमा हामीलाई खासै जानकारी भएन । अहिले सबै कुरा आयोगमा पठाएका छौँ”, उहाँले भन्नुभयो ।