महोत्सवमा करिब रु डेढ करोड सङ्कलन
मङ्सिर२, म्याग्दी
म्याग्दीको सदरमुकाम बेनीमा रहेको म्याग्दी बहुमुखी क्याम्पसमा सञ्चालित धार्मिक तथा शैक्षिक महोत्सवको छैटौँ दिनसम्म करिब साढे एक करोड रुपैयाँ सङ्कलन भएको छ ।
    क्याम्पसमा स्नातकोत्तर तह सञ्चालन र प्राविधिक शिक्षा थप गर्ने उद्देश्यले आयोजित महोत्सव तथा श्रीमद्भागवत ज्ञान महायज्ञको मङ्गलबारसम्म कुल रु एक करोड ४५ लाख ५६ हजार पाँच आर्थिक सङ्कलन गरिएको हो ।

    महोत्सवको छैटौँ दिन मङ्गलबार मात्रै रु ५९ लाख दुई हजार आर्थिक सङ्कलन भएको महायज्ञका लेखा व्यवस्थापन उपसमितिका संयोजक कृष्णबहादुर थापाले जानकारी दिनुभयो । छैटौँ दिनमा सबैभन्दा धेरै जिल्ला विकास समिति म्याग्दीले रु २५ लाख सहयोग गरेको छ ।     त्यसैगरी, पर्वतको धाइरिङ घर भई हाल बेलायतमा व्यवसाय गर्दै आउनुभएका गैरआवासीय नेपाली सङ्घ (एनआरएन)का युरोप संयोजक कुल आचार्यले रु दुई लाख ५१ हजार १५१ सहयोग गर्नुभएको छ । उक्त शैक्षिक महोत्सव तथा धार्मिक महायज्ञमा प्रमुख कथावाचक पण्डित दिनबन्धु पोखरेल र सहवाचक ध्रुवशरण बस्यालले कथावाचन गर्नुभएको छ ।

गत बिहीबारदेखि सुरु भएको महायज्ञ आउँदो मङ्सिर २ गतेसम्म सञ्चालन हुने र त्यसबाट झन्डै रु पाँच करोड आर्थिक सङ्कलन गरिने लक्ष्य लिइएको छ ।     जिल्लामै पहिलो पटक स्नातकोत्तर तहको पठनपाठन र प्राविधिक शिक्षा थप गर्ने उद्देश्यले महायज्ञ सञ्चालन गरिएपछि स्वदेश तथा विदेशमा रहेका जिल्लावासीले सहयोग गर्ने क्रम बढेको छ