दश टन आलुको विऊ वितरण
पर्वत,२४कार्तिक
जिल्ला कृषि विकास कार्यालय पर्वतले १० मेट्रिक टन आलुको बिऊ वितरण गरेको छ । धान र कोदो थन्क्याईसकेपछि खेतवारीमा हिउँदे खेतीको रुपमा लगाउने आलुको विऊ वितरण गरेको हो । जिल्लाका विभिन्न गाविसका कृषकहरुलाई ढुवानी अनुदानमा आलुको विऊ वितरण गरिएको जिल्ला कृषि विकास कार्यालय पर्वतले जनाएको छ । स्याङ्जाको गल्याङ क्षेत्रमा उत्पादित आलु बुटबलबाट ढुवानी अनुदानमा कृषकहरुलाई उपलव्ध गराइएको हो । कृषकलाई प्रतिकिलोग्राम ६० रुपैयाका दरले आलुको बिऊ वितरण गरिएको बरिष्ठ कृषि विकास अधिकृत बासुदेव रेग्मीले जानकारी दिए ।
जनक जातको उक्त आलुका बिऊ पर्वतको हावापानीमा उपयुक्त हुने र सहजै उत्पादन लिन सकिने भएकाले कृषकहरुको माग अनुसार ढुवानी अनुदानमा ल्याइएको हो । उच्च पहाडी गाविसहरुमा बाहेक अन्य गाविसमा हिउँदे आलुखेती हुँदै आएको छ । जिल्लाको पाङ, खुर्कोट, नाङलीवाङ, धाईरिङ्ग, कटुवाचौपारी, ठुलीपोखरी, पिपलठारी, खौलालाकुरी, फलेवास क्षेत्र, बर्राचौर, हुवास, त्रिवेणी लगायतका तीन दर्जन भन्दा बढि गाविसमा हिउँदे आलुको खेती हुँदै आएको छ । भने जिल्लाको उत्तरी क्षेत्रका बनौ, शालिजा, लेखफाँट, क्याङ, भुकताङ्ले, बाँसखर्क, भोक्सिङ्ग लगायतका गाविसमा बर्खे आलु उत्पादन हुँदै आएको छ ।
चालु आर्थिक वर्षएमा भने पर्वतमा आलुको उत्पादनमा गिराबट आएको छ । अघिल्लो वर्षको हिउँदमा परेको लामो समयको खडेरीका कारण आलु उत्पादन झण्डै ५० प्रतिशतले कमी आएको हो । जिल्लाको उच्च पहाडी भेगमा पर्ने ती गाविसका मुख्य बाली आलु खेतीनै भएपनि ७ महिना महिना लामो खडेरीका कारण यसवर्ष उत्पादनमा गिराबट आएको कृषकहरुले गुनासो गरेका छन् । मुख्य बालीकै उत्पादन घटेपछि कृषकहरु चिन्तित बनेका छन् ।
पर्वतमा एक हजार पाँच सय ५० हेक्टर क्षेत्रफलमा आलु खेती हुँदै आएको छ । उक्त क्षेत्रफलमा गरिएको आलु खेतीबाट २३ हजार २ सय ५० मेट्रिक टन आलु उत्पादन हुने गरेको बरिष्ठ कृषि विकास अधिकृत बासुदेव रेग्मीले जानकारी दिएका छन् । तर गत वर्षको खडेरीका कारण आलु उत्पादनमा ठुलो मात्रामा गिराबट आएको उनले बताउ । विशेषगरी सवैभन्दा बढि आलु उत्पादन हुने उत्तरी पर्वतका गाविसमा उत्पादन घटेको हो । शालिजा, लेखफाँट, बनौ, क्याङ लगायतका गाविसमा उत्पादित आलुको मुल्य प्रतिकिलो ४० देखि ५० रुपैयामा विक्रि गर्दै आएको शालिजाका कृषक प्रताप पुनले जानकारी दिए । बजारमा माग अत्याधिक भएपनि उत्पादन घटेकाले माग अनुसार पु¥याउन नसकिएको पुनले बताए । पछिल्लो समय गाउँमै सडक यातायातको पहुँच पुगेकाले दैनिकजसो ढुवानी गरेर बजारमा पठाईसकिएको उनले बताए ।
पर्वतमा उत्पादित आलु पोखरा, काठमाडौ, नारायणगढ सम्म पुग्ने गरेको छ । उत्तरी क्षेत्रका कृषकको मुख्य वालीनै आलु भएकाले प्रत्येक कृषकले बार्षिक रुपमा १ देखि ५ लाख सम्म आम्दानी गर्ने गरेको शालिजाका कृषक वलबहादुर पुनले बताउनुभयो । यस वर्ष थोरै उत्पादन भएकाले साउनमै विक्रि भैसकेको उहाँको भनाई रहेको छ । पोखरा, काठमाडौ, बागलुङ लगायतका जिल्लाबाट आलुको माग गर्दै दैनिक दर्जनौ व्यावासायीको टेलिफोन आउने गरेपनि गाउँमै आलु रित्तिइसकेकाले पठाउन नसकिएको पुनले बताए । छिटो पाक्ने र खानका लागि पनि स्वादिलो लोकल जातको आलु भएकाले यहाँ उत्पादित आलु बढि लोकप्रिय रहेको कृषकहरुले बताएका छन् ।
