पुस्तकालयलाई रु पैँतालीस लाख सहयोग
कार्तिक २०, मुस्ताङ
मुस्ताङ टुकुचेस्थित थाक पुस्तकालय व्यवस्थापनका लागि रिड नेपाल नामक संस्थाले रु ४५ लाख आर्थिक सहयोग प्रदान गरेको छ । पुस्तकालय भवन निर्माण, तालिम कक्ष तथा पुस्तकालय कक्ष र बालकक्ष विस्तार गर्ने उद्देश्यले रिड नेपालले उक्त रकम सहयोग गरेको हो । प्रदान गरेको रकम मध्ये रु २५ लाख भवन निर्माण तथा २० लाख पुस्तक खरिददेखि विभिन्न कक्ष निर्माणमा खर्च गरिने पुस्तकालयका सचिव गोविन्द श्रेष्ठले बताउनुभयो । “भवन निर्माणका लागि संसद् विकास कोषबाट रु पाँच लाख तथा गाविसबाट रु एक लाख बजेटको पनि व्यवस्था भएको छ”, सचिव श्रेष्ठले भन्नुभयो, “त्यसबाट पनि अपुग भएमा बाँकी रकम हामीले स्थानीयस्तरमा श्रमदान गर्नेछौँ ।” थाक पुस्तकालयका भवन निर्माणका लागि अझै रु २० लाख रकम आवश्यक पर्ने भएकाले विभिन्न व्यक्तिसँग सहयोगको अपिल गरिएको पुस्तकालय व्यवस्थापन समितिले जनाएको छ । पुस्तकालयमा पाँच हजारभन्दा बढी पुस्तक छन् ।