म्याग्दीको विकासमा सघाउन घोषणापत्र
असोज २२ म्याग्दी
प्रवासी म्याग्देलीको साझा संस्था म्याग्दी प्र्रवासी नेपाली सङ्घ (मोना), अन्तर्राष्ट्रिय कार्यकारी समितिको प्रथम साधारणसभा नौबुँदे घोषणापत्र जारी गर्दै बिहीबार बेनीमा सम्पन्न भएको छ । मोनाको १८ वटा देशका ५६ जना प्रतिनिधिको सहभागितामा दुई दिनसम्म चलेको साधारणसभाले विदेशमा आर्जित पँुजी, सीप, प्रविधि र क्षमतालाई जन्मभूमिको सामाजिक तथा आर्थिक विकासमा लगानी गरी जिल्लालाई समृद्ध बनाउन सघाउने निर्णय गरेको छ । धार्मिक, लोकसंस्कृति, पर्यटन, तातोपानी कुण्डलगायत सम्भावनाको पहिचान गरी ती क्षेत्रको विकासका लागि स्थानीयवासी, प्रवासी र विदेशीको लगानी भित्र्याउने निर्णय भएको मोनाका अध्यक्ष योगेन्द्र क्षेत्रीले बताउनुभयो ।
    जन्मथलोको विकासका लागि रोजगारी सिर्जना हुने क्षेत्रमा विदेशमा भएको आम्दानी भित्र्याउने घोषणापत्रमा उल्लेख छ । जिविसले सबै बस्तीमा इन्टरनेट सेवा विस्तार गर्न सुरु गरेको योजनाका लागि हालसम्म ५० लाख रुपैयाँ जुटाइएको र थप रकम सङ्कलन कार्यलाई निरन्तरता दिने मोनाका कोषाध्यक्ष चक्र थापाले जानकारी गराउनुभयो ।

 
    म्याग्दीलाई कृषि, पशुपालन, पर्यटन, जडीबुटी, जलविद्युत् र खनिज स्रोतको परिचालन गरी समृद्ध र आत्मनिर्भर बनाउने घोषणा गरिएको छ । साधारणसभाले जिल्लाका विपद्पीडितलाई राहत र मानवीय सेवा तथा परोपकारी कार्यका लागि आकस्मिक कोष निर्माण गर्ने निर्णय पनि गरेको छ । जन्मथलोको विकासका लागि गैरआवासीय नेपाली सङ्घ, जिल्लास्थित सरकारी र स्थानीय निकायसँग समन्वय गर्ने घोषणा गरेको मोनाले संस्थागत विकासलाई अघि बढाउने र विधानका केही बुँदामा संशोधन गरेको जनाएको छ ।
    प्रवासीले मोनामार्फत म्याग्दीको शिक्षा, स्वास्थ्य, विपन्नको उपचार, सूचना प्रविधिको पहुँच विस्तारका साथै पूर्वाधार निर्माणमा बर्सेनि करोडौँको सहयोग भित्र्याएका छन् ।