पहिरोले पर्वतको भुकताङलेका पाँच घर विस्थापित, लघु जलविद्युत अबरुद्ध

अविरल वर्षाका कारण बस्तीभन्दा माथिबाट आएको पहिरोमा परी पाँच घर विस्थापित बनेका छन् । उत्तरी पर्वतको भुकताङ्ले गाविस वडा नं. ७ स्थित मिदुका पाँच घर विस्थापित बनेका हुन् । बस्तीभन्दा माथिको तिलिबराङको पहाडबाट पहिरो खस्दा स्थानिय दुर्गाबहादुर छन्त्याल, रसबहादुर छन्त्याल, तिर्थबहादुर विक, इन्द्रबहादुर छन्त्याल र चित्रप्रसाद भुषालको घरमा क्षति पुगेको हो । उनिहरु अहिले आफन्तकोमा शरण लिएर बसिरहेका छन् ।

गत बुधवार आएको वषासँगैको पहिरोले उनिहरु विस्थापित हुनु परेको स्थानिय महान बहादुर गुरुङ्गले जानकारी  दिनुभयो । पहिरोका कारण विद्युत पोल समेत ढलेका कारण स्थानिय अझै त्रसित बनिरहेका छन् । आर्थिक रुपमा कमजोर अवस्था भएका परिवारहरु जीवनमा नसोचेको घटना भएपछि बिचल्लीमा परेका छन् । तत्काल अर्को ठाउँमा बस्ती सार्न न जग्गा छ न पैसा निकै समस्यामा परेको गुरुङ्गले जानकारी दिनुभयो ।

उनिहरुले आफुहरुलाई सुरक्षित स्थानमा सार्ने व्यवस्था गरिदिन पनि आग्रह गरेका छन् । सोहि पहिरोका कारण बस्ती नजिकै रहेको करायटोलको खानेपानी योजना पुर्ण रुपमा अबरुद्ध बनेको छ । पहिरोले ट्याङ्की नै बगाएपछि खानेपानी सेवा अवरुद्ध बनेको गुरुङ्गले जानकारी दिनुभयो ।

त्यसैगरी पहिरोका कारण भुकताङ्ले गाविस ८ मा रहेको २५ किलोवाट क्षमताको ठाडोखोला लघजलविद्युत आयोजनाको नहर भत्किदा विद्युत उत्पादन बन्द भएको छ । विद्युत बन्द हुँदा स्थानिय विगत पाँच दिनदेखि अन्धकारमा बस्नुपरेको बताएका छन् । उनिहरुले तत्काल मर्मतका लागि पहल गरिदिन पनि माग गरेका छन् । पहिरोकै कारण नयाँपुल–भुक–झिलिबराङ सडक समेत अवरुद्ध बनेको गुरुङ्गले जानकारी दिनुभयो ।