ग्वालीचौरमा न्वागी मेलाको रौनक

मङ्सिर ५ बाग्लुङ

बागलुङको ग्वालीचौरमा मनाईने साँस्कृतिक महत्वको ऐतिहासिक न्वागी मेला सुरु भएको छ ।
 यो मेलालाई पौदीबासीहरुले विशेष पर्वको रुपमा मनाउने गर्छन । मेलामा लाखौंको कारोबार हुने गरेको छ । स्थानिय उत्पादनको प्रबद्र्धन तथा प्रोत्साहन गर्ने उद्धेश्यका साथ कृषि मेला प्रदर्शनी गर्ने गरिन्छ । कृषकहरुले उत्पादन गरेका नगदे, हिउँदे, खाद्यान्न, बेमौसमी लगायतका कृषि प्रदर्शनीमार्फत कृषकलाई सम्मान गर्ने गरिएको पौदी न्वागी मेला ब्यबस्थापन समितिका सचिब बिष्णुप्रसाद आचार्यले जानकारी दिए । कृषि उपजको प्रदर्शनीमा अहिलेसम्म २० जना किसानले आफ्ना उत्पादन प्रदर्शन गरेका छन् । स्थानियका अनुसार, त्यस क्षेत्रमा उत्पादन हुने जर्डन प्रजातीको धानलाई दहिमा भिजाई, केरा, सिलाम, चिनी राखी स्वादिष्ट न्वागी बनाई खेत भएका र नभएका दुबैले खाने गर्छन् । खेत भएकाहरुले खेत नभएकालाई पनि निम्ता गर्छनभने आफन्त, ईष्टमित्रलाई पनि न्वागी खुवाउने प्रचलन रहेको छ । उत्तम साईतमा पौँदेलीहरुले न्वागी खाईसकेका छन् । दशकौ देखी त्यस क्षेत्रमा न्वागी खाने मेला लाग्ने गरेको छ ।

परापुर्व कालमा स्थानीयहरुले बाजागाजा बजाउने, भैलो तथा सोरठी गाएर मनाउने गरिएको यस पर्वलाई आजकल आधुनिकताले छोपेको बुढापाकाहले गुनासो गरेका छन् । ग्वालीचौरको खार बजारमा भएको प्रसिद्ध न्वागी पर्व बागलुङको ग्वालिचौर, जलजला, दगातुम्डाँडा तथा गुल्मीको पौँदीअमराई, नेटा, दोहोली क्षेत्रका नागरिकको सहभागिता रहने भएपनि यो न्वागी पर्व (मेला) बागलुङ र गुल्मीसंगै नेपालको पश्चिम क्षेत्रकै महत्वपूर्ण पर्वको रुपमा स्थापित भएको छ । न्वागी मेलामा ब्यापार, प्रदर्शन, खरेलकुद लगायत गरी एक सय ५ स्टलहरु रहेका छन । राष्ट्रिय कलाकारहरु मिना लामा तथा चिजा तामाङले भरपुर मनोरञ्जन प्रदान गरिरहेका छन् । मेलामा आयोजना गरिएको खुल्ला भलिबल प्रतियोगीतामा १८ समुहरुको सहभागीता रहेको छ ।